المساعد الشخصي الرقمي

مشاهدة النسخة كاملة : القرد عراها قوي ..!!



نبيل مصيلحى
04-12-2016, 04:06 PM
القرد عراها قوي ..!! شعر / نبيل مصيلحي
ـــــــــــــــــــ
الشكل شكل الجمبري
والضحكه ضحكة مفتري
ياكل على كل الطبالي ما يستحيش
عايز يعيش ..
بلوشي ويكون الولي /
سيدنا الولي .. !!
أبو عمَّه خضره ومسبحه
وهدوم رامتها المدبحه ..
ف سلة موات
حبة حروف متلفقة
في روايه فالصو مفتأه
لقلب مليان بالسواد
الوهم عشش ..
كل أنحاء فكرته / حضرته
موهوم قوي .. إنه الولي
والإيد نضيفه وقلب أطهر ..
م البراءة المفرطه
آه والنبي .. !!
مولد غبي
وظروف تخلي ( البغل ) ..
ريس ع الحصان
النمل أصبح له سنان
والقرد عراها قوي ..
وعايزها دنيا تحتوي كل القرود
سيدنا الولي ..
أبو عمَّه خضره ومسبحه
مشتاق قوي كل الوشوش
له تنحني ..!!
وتبوس إيديه
منفوخ كما دكر الفراخ
ديك البراري مش بعيد ..
يمكن يبيض ..!!
يرقد كمان .. يفقس عيال
تمشي قصاده ..
توسع السكه لجنابه
أصل الولايه خلاص بقى ..
صبحت في إيد حبِّة عيال
لا فيه عقول
ولا فيه ضمير ..
والجحش أصبح دون غرابه
في عُرفهم أفضل سفير
مولد غبي ..
منصوب على صدر المفيش
مراجيح ونطيطه وقفيش
سيرك انما ..
فيه الحواه والأرجوزات
فيه التعالب والسوالب والشتات
مفيهوش سوي ..!!!
مولد غبي ..
ولا فيهشي فطوط فنجري
يعلا بصوته يستغيث
من حضرت الحفل الرهيب
يرسم ملامح للطريق
وباب كبير ..
يخرج بقى شلة الفقر الولي
أبو شكل شكل الجمبري
أبو ضحكه ضحكة مفتري
واكل على كل الطبالي ما يستحيش
عايز يعيش ..
بلوشي ويكون الولي
ـــــ
شعر / نبيل مصيلحي