المساعد الشخصي الرقمي

مشاهدة النسخة كاملة : ( على شوك البعاد .. مدِّاح )قصيدة بالعامية المصرية / نبيل مصيلحي



نبيل مصيلحى
11-14-2010, 11:50 PM
( على شوك البعاد .. مدَّاح )
ــــــــــــــــــــــــــــــــــــــــــــــــــ ـــــــــــــــــــ

بأي أماره هافرش لك حنين توبي
وامد الإيد
واقول أهلاً يا نن العين
يا حبة قلبي
يا فرط الغرام والشوق
وادندن لك على عود اللقا موال
ما انا اللي بيكي كنت
وكان ما بينِّا هيام
وكنت النخله طرَّاحه
حنان وسلام
وكنت البسمه
وقت ما يسرقوا فرحك
راسمهالك على خدودك
وكنت الضي
وقت ما يطفوا نور الصبح في عيونك
أجيب الفجر لو كان فين
وأحلب ضيُّه في جبينك
واضفَّر بالأمان يومك
تشبِّي نهار
بيتدادى على إيدي
وكنت وكنت انا وانتي
بنتوحد في قمرايه
يتوه الليل
يدوق الموت على حدودك /
على حدودي
يقوم تاني يغني لك
تحني عليه
تمدي له
أوام إ يدك
وتمشي معاه .. تفوتيني
بأي أماره هافرش لك حنين توبي
ومين منَّا اللي ساب خِلُه
في درب التوهه بيعاني
مشي مندار لدار تانيه
وسوق بكَّاش
وتجار ليل
ما تعرف غير تطفف
في معاني القول
وتسرق حلم
عشت سنين أداري عليه
ومن صبري
وأيام الضنا أرويه
يزمزمني الأسى والأه
تمدي الخطوه تمشي وراه ..
تفوتيني
بأي أماره ها فرش لك حنين توبي
ومين منَّا اللي ساب ناسه
على ابواب الزمن واقفه
تمد الإيد
وإيد تدِّي
وإيد تنكر
أشوف الدمع في عيونهم
بيتكلم
بيتألم
تقطَّع قلبي نظرتهم
ما انا منهم
بلحم الحر بتوحَّد
جبل واحد في وش الريح
نهدُّه مهما كان قادر
وتتساندي
وتتعافي على عودي /
على النوَّار
تقومي بوش طفل بريء
على كتفي
ما انا عكازك الواقف مابيلنشي
وانا عيونك في ليل ونهار ما بتنمشي
ولا اغبشي
وفي وجودي تجافيني ..
تفوتيني
بأي أماره ها فرش لك حنين توبي
يا دمعه نازله فوق خدي
تبلل بالمرار يومي
بقيت صبار
بقيت الآهه والأنَّه
بقيت محروم من الجنه
على شوك البعاد ماشي
ألملمني في قلب الصبح من تاني
ومن نهر السماح أشرب
أقول جايز..
هتيجي تبصي في عيوني
تهدهد قلبي
وتطبطب على كتفي
وأقول تايبه ..
أتاريكي
تعيدي الكرَّه والنايبه ..
تفوتيني
بأي أماره هافرش لك حنين توبي
وتخرج مني أيام الزمن باكيه
وحالي لسَّه في رحال الغرام مداح
لا أنا قادر أتوب من حبك الطاغي
ولا قادر في يوم أكفر بك
واعيش مرتاح
بقيت محتار ما بين بعدك وبين قربك
نارين مالهمش أي خلاص
بعيد محروق بنسيانك
قريب محروق بإهمالك
نزيف القلب بيسرسب
في أطفاله قصاد عيني
تموت منى ..
ولا تحني
ولا يصعب عليكي ضناي
وبتصدي
تروحي عني وتغيبي ..
تفوتيني
بأي أماره هافرش لك حنين توبي
...